ਬੀ. ਕੇ .ਯੂ. (ਲੱਖੋਵਾਲ) ਵੱਲੋਂ ਸਮਰਾਲਾ ਬੰਦ ਨੂੰ ਸਫਲ ਬਣਾਉਣ ਲਈ ਸਮੂਹ ਦੁਕਾਨਦਾਰਾਂ ਦਾ ਕੀਤਾ ਧੰਨਵਾਦ
ਬਰਨਾਲੇ ਵਿੱਚ ਸਫਾਈ ਸੇਵਕਾਂ ਕੀਤੇ ਤਸ਼ੱਦਦ ਖਿਲਾਫ ਸਮਰਾਲਾ ਬੰਦ ਨੇ ‘ਆਪ’ ਸਰਕਾਰ ਵਿਰੁੱਧ ਦਿੱਤਾ ਵੱਡਾ ਫਤਵਾ -ਮਨਜੀਤ ਸਿੰਘ ਢੀਂਡਸਾ
ਸਮਰਾਲਾ 30 ਜੁਲਾਈ ( ਵਰਿੰਦਰ ਸਿੰਘ ਹੂੰਝਣ) ਬਰਨਾਲਾ ਵਿਖੇ ਸਫਾਈ ਸੇਵਕ ਜੋ ਸ਼ਾਂਤਮਈ ਆਪਣੀਆਂ ਮੰਗਾਂ ਸਬੰਧੀ ਧਰਨਾ ਦੇ ਰਹੇ ਸਨ, ਤਾਂ ਬਰਨਾਲਾ ਪੁਲਿਸ ਵੱਲੋਂ ਉਨ੍ਹਾਂ ਨਾਲ ਪਸ਼ੂਆਂ ਵਰਗਾ ਵਤੀਰਾ ਕਰਕੇ ਉਨ੍ਹਾਂ ਉੱਤੇ ਅੰਨ੍ਹ ਤਸ਼ੱਦਦ ਢਾਹਿਆ ਗਿਆ, ਜਿਸ ਦੀ ਆਮ ਜਨਤਾ ਦੇ ਮਨਾਂ ਉੱਤੇ ਗਹਿਰੀ ਸੱਟ ਲੱਗੀ ਸੀ, ਜਿਸਦੇ ਫਲਸਰੂਪ ਅੱਜ ਸਫਾਈ ਸੇਵਕਾਂ ਵੱਲੋਂ ਸਮਰਾਲਾ ਸ਼ਹਿਰ ਪੂਰਨ ਰੂਪ ਵਿੱਚ ਬੰਦ ਰੱਖਿਆ ਗਿਆ ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਮਨਜੀਤ ਸਿੰਘ ਢੀਂਡਸਾ ਜ਼ਿਲ੍ਹਾ ਪ੍ਰਧਾਨ ਭਾਰਤੀ ਕਿਸਾਨ ਯੂਨੀਅਨ (ਲੱਖੋਵਾਲ) ਨੇ ਪ੍ਰੈਸ ਨਾਲ ਗੱਲਬਾਤ ਕਰਦੇ ਹੋਏ ਕੀਤਾ। ਉਨ੍ਹਾਂ ਅੱਗੇ ਕਿਹਾ ਜੇਕਰ ਕੋਈ ਬੰਦਾ ਕੁੱਤੇ, ਗਾਂ ਜਾਂ ਹੋਰ ਜਾਨਵਰ ਉਪਰ ਹਮਲਾ ਕਰਦਾ ਹੈ ਤਾਂ ਪੁਲਿਸ ਤੁਰੰਤ ਉਸ ਉਪਰ ਵੱਡੀਆਂ ਧਰਾਵਾਂ ਲਾ ਕੇ ਪਰਚਾ ਦਰਜ ਕਰ ਦਿੰਦੀ ਹੈ। ਇਹ ਸਫਾਈ ਸੇਵਕ ਸਾਡੇ ਘਰਾਂ ਦਾ ਅਤੇ ਸ਼ਹਿਰਾਂ ਵਿੱਚ ਸਫਾਈ ਆਪਣੇ ਸਿਰਾਂ ਉੱਤੇ ਗੰਦ ਢੋਂਹਦੇ ਹਨ ਅਤੇ ਲੋਕਾਂ ਨੂੰ ਬਿਮਾਰੀਆਂ ਬਚਾਉਂਦੇ ਹਨ, ਇਹ ਸਫਾਈ ਕਰਨ ਵਾਲੇ ਮਜ਼ਦੂਰ ਆਪਣਾ ਹੱਕ ਮੰਗਣ ਲਈ ਸ਼ਾਂਤਮਈ ਮੁਜਾਹਰਾ ਕਰ ਰਹੇ ਸਨ ਤਾਂ ਪੁਲਿਸ ਵੱਲੋਂ ਉਨ੍ਹਾਂ ਦੇ ਸਿਰਾਂ ਉੱਤੇ ਡੰਡੇ ਵਰ੍ਹਾਏ , ਜੋ ਆਮ ਆਦਮੀ ਪਾਰਟੀ ਦੀ ਵੱਡੀ ਨਲਾਇਕੀ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ 1000/ 1500 ਰੁਪਏ ਖਾਤਿਆਂ ਵਿੱਚ ਪਾ ਕੇ ਵੱਡੀ ਵੱਡੀ ਇਸ਼ਤਿਹਾਰਬਾਜੀ ਕਰਕੇ ਕਹਿੰਦੇ ਹਨ ਕਿ ਮੈਨੂੰ ਮਾਵਾਂ ਭੈਣਾ ਦਾ ਸਤਿਕਾਰ ਕਰਕੇ ਬਹੁਤ ਸਕੂਨ ਮਿਲਦਾ ਹੈ, ਦੂਸਰੇ ਪਾਸੇ ਆਪਣੀ ਪੁਲਿਸ ਵੱਲੋਂ ਇਨ੍ਹਾਂ ਮਾਵਾਂ ਭੈਣਾ ਦੇ ਸਿਰਾਂ ਵਿੱਚ ਡੰਡੇ ਮਰਾਉਂਦੇ ਹਨ। ਇਹ ਕਿਹੋ ਜਿਹਾ ਸਤਿਕਾਰ ਹੈ, ਜਿੱਥੇ ਔਰਤਾਂ ਉੱਤੇ ਹੱਥ ਚੁੱਕਿਆ ਜਾਂਦਾ ਹੈ। ਅਖੀਰ ਉਨ੍ਹਾਂ ਸਮਰਾਲਾ ਸ਼ਹਿਰ ਵਾਸੀਆਂ ਦਾ ਸਫਾਈ ਸੇਵਕਾਂ ਦੇ ਹੱਕ ਵਿੱਚ ਸਾਥ ਦੇਣ ਦਾ ਧੰਨਵਾਦ ਕੀਤਾ ਜਿਨ੍ਹਾਂ ਨੇ ਆਮ ਲੋਕਾਂ ਦਾ ਸਾਥ ਦੇ ਪੰਜਾਬ ਸਰਕਾਰ ਨੂੰ ਵੱਡਾ ਹਲੂਣਾ ਦਿੱਤਾ ਹੈ।
